དེ་ཡང་དང་པོའི་སངས་རྒྱས་དུས་ཀྱི་འཁོར་ལོའི་ལམ་འབྲས་བུ་དང་བཅས་པ་ལ་མི་ཕྱེད་པའི་དད་པ་དང་ལྡན་ཞིང༌། བསོད་ནམས་མཆོག་གི་སྐལ་བ་དང་ལྡན་པ། སྐོམ་པས་ཆུ་འདོད་ལྟར་དུས་ཀྱི་འཁོར་ལོའི་དབང་དོན་དུ་གཉེར་བའི་དོན་གཉེར་ཅན་དག་གིས་དུས་ཀྱི་འཁོར་ལོའི་དབང་ཞུ་བ་ལ། དང་པོར་སྐྱབས་འགྲོ། ངེས་འབྱུང༌། བྱང་སེམས། ཡང་དག་པའི་ལྟ་བ་སོགས་བཅོས་མ་ཚུན་ཆད་ཀྱིས་རྒྱུད་སྦྱངས་པ་སྔོན་དུ་སོང་ནས།
རྣལ་འབྱོར་བླ་མེད་ཀྱི་རྒྱུད་གཞན་དང་བཤད་སྲོལ་ཐུན་མོང་མ་ཡིན་པ་དུས་ཀྱི་འཁོར་ལོའི་དབང་གི་ངོ་བོ་དང༌། དབང་གི་གྲངས། དེ་དག་གི་སྐབས་སུ་དམིགས་པ་ཡིད་ལ་བྱ་ཚུལ། རྡོ་རྗེ་སློབ་དཔོན་གྱིས་ཇི་ལྟར་བརྡ་སྤྲད་པ་ལྟར་བརྡ་འཕྲོད་ངེས་སུ་བྱས་ཏེ། སེམས་ལ་འགྱུར་བ་ཐེབས་པ་ཞིག་ངེས་པར་དགོས། དཔེར་ན། རང་ཅག་རྣམས་ཀྱི་རྒྱུད་ལ་ཆགས་སྡང་མངོན་དུ་གྱུར་པའི་ཚེ། རྒྱུན་གྱི་སེམས་དང་མི་འདྲ་བར་སེམས་ལ་འགྱུར་བ་ཞིག་ཐེབས་བཞིན་པ་དེ་ཡི་དབང་གིས་ལུས་ངག་གི་སྤྱོད་པ་ལ་ཡང་འགྱུར་བ་ཐེབས་པ་དེ་བཞིན། དབང་གི་སྐབས་སུ་ཡང་སེམས་ལ་འགྱུར་བ་ཞིག་ཐེབས་པ་གལ་ཆེ། བཟང་ཕྱོགས་ཀྱི་འགྱུར་བ་ཅི་ཙམ་ཐེབས་པ་དེ་ཙམ་གྱིས་དབང་ཐོབ་པ་ལ་ཕན་ཐོགས་ཆེ། དབང་གྲལ་དུ་དུས་གཅིག་ཏུ་མི་མང་འཚོགས་ནའང་དབང་བརྡ་འཕྲོད་མ་འཕྲོད་དང་ཀུན་སློང་འཁྱེར་ཚུལ། དམིགས་པ་ཡིད་ལ་བྱ་ཚུལ་བཅས་ཀྱི་དབང་གིས་དབང་ཐོབ་ཚུལ་རིམ་པ་དུ་མ་ཞིག་འབྱུང་བར་ངེས་ཏེ། དེ་ཡང་ཕྱག་ན་པདྨོ་སྐལ་བཟང་རྒྱ་མཚོས་མཛད་པའི་དུས་འཁོར་དཀྱིལ་ཆོག་ལས། བླ་མས་རང་རང་གི་གོ་བ་དམིགས་ཕྱེད་པ་ལེགས་པར་བཤད་ནས། རང་འདོད་ལྷ་ཡབ་ཡུམ་དུ་མོས་པ་དང༌། དེ་འདྲ་བའི་ཡུམ་ལ་འཁྱུད་ཅིང་ནུ་མ་ལ་རེག་པ་དང་སྙོམས་པར་ཞུགས་པ་སོགས་སུ་མོས་པས། དབང་རྣམས་ཐད་སོ་ཐད་སོའི་དགའ་བ་སྐྱེས་པ་དང༌། བདེ་བ་དེ་སྟོང་པ་ཉིད་དང་སྦྱར་བ་སོགས་སུ་མོས་པ་སྒོམ་དུ་གཞུག་ཅིང༌། དེའི་ཐོག་ནས་དབང་དོན་ངོ་སྤྲོད་པར་བྱ་ལ། དེ་དག་གིས་བརྡ་འཕྲོད་མ་འཕྲོད་ཀྱི་ཁྱད་པར་གྱིས་དུས་གཅིག་ཏུ་དཀྱིལ་འཁོར་དུ་ཞུགས་ཤིང་དབང་བསྐུར་བ་མནོས་པར་མཚུངས་པ་ལ་ཡང་དབང་གི་ཐོབ་ཚུལ་རིམ་པ་དུ་མ་ཞིག་འབྱུང་བ་ཡོད་དོ།། ཞེས་གསུངས་པ་ལྟར་རོ།། ཐོག་མཐའ་གཉིས་ལ་བྱ་བ་གཉིས།། ཞེས་གསུངས་པ་ལྟར། ཐོག་མར་ཀུན་སློང་བཅོས་ཚུལ་གལ་ཆེ་བས། རྡོ་རྗེ་སློབ་དཔོན་གྱིས་ཀུན་སློང་བཅོས་ཚུལ་བརྡ་ཇི་ལྟར་སྤྲད་པ་ལྟར། ཚེ་འདིར་ནད་མེད་པ་དང་ཚེ་རིང་བ། ཕྱི་མར་མངོན་མཐོ་ལྷ་མིའི་གོ་འཕང་དོན་དུ་གཉེར་བ་སོགས་ཀྱི་ཀུན་སློང་ངན་པ་རྣམས་སྤང་ནས། སེམས་ཅན་ལ་དམིགས་པའི་བྱམས་པ། སྙིང་རྗེ། དེས་དྲངས་པའི་སེམས་ཅན་གྱི་དོན་དུ་སངས་རྒྱས་ཀྱི་གོ་འཕང་ཐོབ་པར་འདོད་པའི་བྱང་ཆུབ་ཀྱི་སེམས་བཅོས་མ་ཚུན་ཆད་ཀྱིས་ཟིན་པ་ངེས་པར་དགོས་ལ། ཐེག་པ་ཆེན་པོའི་ཆོས་སུ་འགྲོ་མི་འགྲོ་ནི་སེམས་འདི་ཉིད་ལ་རག་ལས་པའི་ཕྱིར། དེ་ཡང་སྤྱིར་དབང་གི་ཆོ་ག་ལ། དབང་གི་འགག་སྡོམ་ས་བཅད་ཆེན་མོ་གསུམ།། ཞེས་གསུངས་པ་ལྟར། ས་ཡི་ཆོ་ག སྟ་གོན་གྱི་ཆོ་ག དངོས་གཞིའི་ཆོ་ག་དང་གསུམ། དང་པོ་ལའང་ས་བརྟག་པ། ས་སྦྱང་བ། ས་སློང་བ། ས་བཟུང་བ། སྲུང་བཞིན་བྱིན་གྱིས་བརླབས་པ་སོགས་ལྔ་དང༌། སྟ་གོན་གྱི་ཆོ་ག་ལ་ས་ལྷ་ལྷག་གནས་དང༌། བུམ་པ་ལྷག་གནས། དཀྱིལ་འཁོར་ལྷག་གནས། ལྷ་ལ་གསོལ་འདེབས། སློབ་མ་ལྷག་གནས་བཅས་ལྔ་དང༌། ལྔ་པ་སློབ་མ་སྟ་གོན་ལ་ཀུན་སློང་བཅོས་བཞིན་དབང་བསྐུར་བ། གསོལ་བ་བཏབ་ཅིང་འཛིན་དུ་ཞུགས་པ། སྡོམ་པ་སྲུང་ཞིང་བྱིན་གྱིས་བརླབས་པ། སཱུ་ཤིང༌། ཁྱོར་ཆུ། ཀུ་ཤ སྲུང་སྐུད་སྦྱིན་པ། སྤྲོ་བ་བསྐྱེད་པ། བགེགས་སྲུང་བ། རྨི་ལམ་བརྟག་པར་གདམས་པ་བཅས་ལས། དང་པོ་ཀུན་སློང་བཅོས་ཚུལ་གོང་དུ་བཤད་པ་ལྟར་དང༌། ནང་དབང་བསྐུར་ཚུལ་ནི། མཁས་གྲུབ་རིན་པོ་ཆེས་མཛད་པའི་དུས་འཁོར་དཀྱིལ་ཆོག་ལས། རང་ཉིད་དུས་ཀྱི་འཁོར་ལོ་ཡབ་ཡུམ་དུ་གསལ་བའི་ཐུགས་ཀའི་འོད་ཟེར་གྱིས་སློབ་མ་རྣམས་རེ་རེ་ནས་དྲངས། རང་གི་ཞལ་དུ་ཞུགས། ཡུམ་གྱི་པདྨར་ཞུ་བ་ཧཱུཾ་དང་རྡོ་རྗེ་ལས་སྐྱེས་པའི་དུས་ཀྱི་འཁོར་ལོ་ཞལ་གཅིག་ཕྱག་གཉིས་པར་བསྐྱེད་པ་ལ། རང་གི་སྙིང་ཁའི་ས་བོན་གྱི་འོད་ཟེར་གྱིས་དེ་བཞིན་གཤེགས་པ་ཐམས་ཅད་སྤྱན་དྲངས་ཏེ་རང་གི་ཞལ་ནས་ཞུགས། ཐུགས་ཀར་རྗེས་སུ་ཆགས་པའི་མེས་ཞུ་བའི་བྱང་ཆུབ་ཀྱི་སེམས་རྡོ་རྗེའི་ལམ་ནས་བྱུང་བས། སློབ་མ་ཤེས་རབ་ཀྱི་པདྨར་གནས་པ་རྣམས་ལ་དབང་བསྐུར། ཡུམ་གྱི་པདྨ་ནས་ཕྱུང་སྟེ་རང་རང་གི་གནས་སུ་བཞག་པར་བསྒོམ་པར་བྱའོ།། ཞེས་གསུངས་པ་ལྟར་རོ།། ནང་དབང་བསྐུར་བའི་དགོས་པ་ནི། འཁོར་ལོས་བསྒྱུར་བའི་རྒྱལ་པོའི་དབང་བསྐུར་བ་ལ། དེ་ཡི་རིགས་སུ་སྐྱེས་པ་ཞིག་དགོས་པ་བཞིན། ལྷ་དེ་དང་དེའི་ཆོས་ཀྱི་རྒྱལ་སྲིད་དུ་དབང་བསྐུར་བ་ལའང་དེ་ཡི་རིགས་སུ་སྐྱེས་པ་ཞིག་དགོས་པ་དེའི་ཆེད་དུ་ཡིན། གསོལ་བ་བཏབ་པ་ནི། སྐྱེ་རྒ་འཆི་བ་ན་ཀྲ་ཡི།། ཞེས་སོགས་ཀྱི་ཚིག་དོན་དྲན་པའི་སྒོ་ནས་དབང་གི་དོན་དུ་བླ་མ་ལ་གསོལ་བ་ལན་གསུམ་འདེབས་དགོས་པ་ཡིན། འཛིན་དུ་ཞུགས་པ་ནི། བུ་ཁྱོད་ཚུར་ཤོག་ཐེག་ཆེན་པོ།། ཞེས་སོགས་ཀྱི་སྔགས་ཀྱི་ཕན་ཡོན་བཤད་པའི་སྒོ་ནས་སློབ་མ་རྣམས་སྔགས་ལ་མོས་པ་བརྟན་པོ་འཛིན་དུ་ཞུགས་པ་ཡིན། སྡོམ་པ་བཟུང་བ་ནི། དབང་བཞི་རྫོགས་པར་ཐོབ་པ་ལ་བྱང་སྡོམ་དང་སྔགས་སྡོམ་གཉིས་ཀ་བཟུང་དགོས་པ་ཡིན། དེའི་ཚུལ་ནི་དཀོན་མཆོག་གསུམ་ལ་བདག་སྐྱབས་མཆི།། ཞེས་སོགས་ལན་གསུམ་གྱི་སྒོ་ནས་ཐུན་མོང་བ་བྱང་ཆུབ་སེམས་དཔའི་སྡོམ་པ་བཟུང་དགོས་པ་ནི། སངས་རྒྱས་བྱང་ཆུབ་སེམས་དཔའ་ཀུན།། ཞེས་སོགས་ལན་གསུམ་གྱིས་ཐུན་མོང་མ་ཡིན་པ་སྔགས་ཀྱི་སྡོམ་པ་བཟུང་དགོས། བྱིན་གྱིས་བརླབས་པ་ནི། རང་ལ་ཐ་མལ་གྱི་སྣང་ཞེན་བཟློག་པའི་ཆེད་དུ་སློབ་མའི་གནས་གསུམ་དུ་ཡི་གེ་བཀོད་ནས་སྒོ་གསུམ་བྱིན་གྱིས་བརླབས་པ་ཡིན། སོ་ཤིང༌འདོར་བ་ནི། ཞི་སོགས་ཀྱི་དངོས་གྲུབ་གང་འགྲུབ་བརྟག་པའི་སླད་དུ་སོ་ཤིང་འདོར་བ་ཡིན། ཁྱོར་ཆུ་སྦྱིན་པ་ནི། གཙོ་བོ་རྫུན་ལ་སོགས་པ་ངག་གི་ཉེས་པ་དག་པའི་ཆེད་དུ་ཡིན། ཀུ་ཤ་སྦྱིན་པ་ནི། ཀུ་ཤ་གཙང་བྱེད་ཡིན་པས་གྲིབ་དང་མི་གཙང་བ་བསལ་ནས་རྨི་ལམ་གསལ་པོ་ཡོང་བའི་ཆེད་དུ་ཡིན། སྲུང་སྐུད་སྦྱིན་པ་ནི། ཕྱི་ནང་གི་བགེགས་སྲུང་བའི་ཆེད་དུ་ཡིན། སྤྲོ་བ་བསྐྱེད་པ་ནི། འཇིག་རྟེན་དུ་ནི་ཀུན་མཁྱེན་རྣམས།། ཨུ་དུམ་ཝ་རའི་མེ་ཏོག་བཞིན།། ཞེས་སོགས་ཀྱི་དོན་བཤད་པའི་སྒོ་ནས་སྤྱིར་སངས་རྒྱས་འབྱུང་བ་དཀོན་པ། དེ་ལས་ཀྱང་སྔགས་ཀྱི་བསྟན་པ་དང་མཇལ་བ་དཀོན་པ། ད་ལྟ་སྔགས་ཀྱི་བསྟན་པ་དང་མཇལ་བ་འདི་བསོད་ནམས་ཀྱི་སྐལ་བ་ཁྱད་པར་ཅན་ཡིན་པ་སོགས་བརྗོད་པའི་སྒོ་ནས་གདུལ་བྱ་ལ་སྤྲོ་བ་བསྐྱེད་པ་ཡིན། རྨི་ལམ་བརྟག་པ་ནི། མཚན་གྱི་ཆ་ཐ་མར་རང་ལ་རྨི་ལམ་བཟང་ངན་གང་འབྱུང་བརྟག་དགོས་པ་ཡིན། རྨི་ལམ་ངན་པ་བྱུང་ན་རྡོ་རྗེ་སློབ་དཔོན་གྱི་སྲུང་འཁོར་བསྒོམ་པ་དང་སྔགས་བཟླས་པ་སོགས་ཀྱི་སྒོ་ནས་བཟློག་པར་བྱ་དགོས་པ་ཡིན། དངོས་གཞིའི་ཆོ་ག་ལ་དཀྱིལ་འཁོར་དུ་ཞུགས་པ་དང༌། ཞུགས་པ་ལ་དབང་བསྐུར་བ་གཉིས། དང་པོ་ལ་གདོང་གཡོག་དང་བཅས་ཏེ་ཞུགས་པ་དང༌། དཀྱིལ་འཁོར་མཐོང་བའི་བདག་ཉིད་ཅན་དུ་ཞུགས་པ་སོགས་ཡོད། དཀྱིལ་འཁོར་དུ་ཞུགས་པའི་སྐོར་ལ། གལ་ཆེ་བ་ཐམས་ཅད་རྣལ་འབྱོར་གྱི་སེམས་བསྐྱེད་པ་ནི། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱའོ་སྙམ་པའི་སྨོན་པའི་སེམས་ཀུན་རྫོབ་པ་དེ་ཉིད་སྙིང་ཁར་ཟླ་བའི་དཀྱིལ་འཁོར་ཡོངས་སུ་རྫོགས་པའི་རྣམ་པར་གྱུར། ཆོས་ཐམས་ཅད་རང་བཞིན་མེད་པའི་སྟོང་པ་ཉིད་དང་རང་གི་སེམས་རོ་གཅིག་ཏུ་གྱུར་པར། དོན་དམ་པའི་བྱང་ཆུབ་ཀྱི་སེམས་དེ་ཉིད་ཟླ་བའི་སྟེང་དུ་རྡོ་རྗེ་དཀར་པོ་རྩེ་ལྔ་པའི་རྣམ་པ་ཅན་དུ་བསྒོམ་པའི་ཐམས་ཅད་རྣལ་འབྱོར་གྱི་སེམས་བསྐྱེད་པ་འདི་ནི་དབང་ཆོག་གང་གི་སྐབས་སུའང་གལ་ཆེ་བས། ཐབས་མཁས་ཀྱི་འཕྲུལ་ཆེན་པོ་ཡིན་པར་གསུངས་ཏེ། སྔགས་རིམ་ཆེན་མོ་ལས། འདི་ལེགས་པར་བརྡ་འཕྲོད་ན། སྔགས་ཀྱི་ཐབས་མཁས་ཀྱི་ཐེག་པ་ཆེན་པོར་རིགས་ངེས་པར་བྱེད་པ་ཁྱད་པར་ཅན་ཞིག་སྣང་བས། ལྟ་བའི་སྟེང་ནས་དོན་དམ་པའི་སེམས་བསྐྱེད་དང་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་འདོད་ཀྱི་སྨོན་པ་གཉིས་དམིགས་ཕྱེད་པར་བྱས་ནས། ཟླ་བ་རྡོ་རྗེའི་རྣམ་པར་བསྐྱེད་པར་བྱ་སྟེ། འདི་དང་འདི་འདྲ་བ་གཞན་རྣམས་ཀྱང་ཚིག་སྤྱི་ལ་མ་ལུས་པར་བརྡ་འཕྲོད་པར་བྱས་ན་རྟེན་འབྲེལ་ཁྱད་པར་ཅན་དུ་མ་ཞིག་འགྲིག་པས་དབང་བསྐུར་བ་ལ་བསྔགས་པ་ཤིན་ཏུ་ཆེ་བ་ཡིན་ནོ།། ཞེས་གསུངས་པ་མ་ཟད། གོང་ས་སྐྱབས་མགོན་ཆེན་པོ་མཆོག་གིས་ཀྱང་འདི་ལ་ནན་ཏན་ཆེན་པོ་མཛད་ཀྱིན་ཡོད་པས། གོ་བརྡ་ལེགས་པར་འཕྲོད་པ་གལ་ཆེའོ།། སྐབས་འདིར་དུས་འཁོར་གྱི་དབང་གི་གྲངས་ལ་བྱིས་པ་ལྟར་འཇུག་པའི་དབང་བདུན་དང༌། གོང་མ་ཀུན་རྫོབ་འཇིག་རྟེན་པའི་དབང་ལ་བུམ་དབང༌། གསང་དབང། ཤེར་དབང༌། དབང་བཞི་པ་དང་བཞི། གོང་ཆེན་དོན་དམ་འཇིག་རྟེན་ལས་འདས་པའི་དབང་ལའང༌། བུམ་དབང༌། གསང་དབང༌། ཤེར་དབང༌། ཚིག་དབང་བཅས་བཞི་དང༌། རྡོ་རྗེ་སློབ་དཔོན་བདག་པོ་ཆེན་པོའི་དབང་བཅས་བཅུ་དྲུག་ཡོད། སྤྱིར་དབང་གི་ངོ་བོ་ནི། དཀྱིལ་ཆོག་གི་སྐབས་སུ། རྫས་སྔགས། ཏིང་ངེ་འཛིན་གསུམ་ལ་བརྟེན་ནས་བསྐྱེད་པའི་བདེ་སྟོང་གི་ཡེ་ཤེས་དང༌། སྐུ་བཞི་གང་རུང་སྒྲུབ་པའི་ནུས་པ་ཁྱད་པར་ཅན་ཞིག་ལ་འཇོག དབང་བཞི་སོ་སོའི་ངོ་བོ་ནི། རྫས་སྔགས་ཏིང་འཛིན་གསུམ་ལ་བརྟེན་ནས་སྐྱེས་པའི་བདེ་སྟོང་གི་ཡེ་ཤེས་དང༌། འབྲས་བུ་སྤྲུལ་སྐུ་སྒྲུབ་པའི་ནུས་པ་ཁྱད་པར་ཅན་གཉིས་ལ་བུམ་དབང་གི་ངོ་བོར་འཇོག གསང་དབང་གི་ངོ་བོ་ནི། གོང་ལྟར་རྫས་སོགས་གསུམ་ལ་བརྟེན་ནས་སྐྱེས་པའི་བདེ་སྟོང་གི་ཡེ་ཤེས་དང༌། འབྲས་བུ་ལོངས་སྐུ་སྒྲུབ་བྱེད་ཀྱི་ནུས་པ་ཁྱད་པར་ཅན་གཉིས་ལ་གསང་དབང་གི་ངོ་བོར་འཇོག ཡང་གོང་ལྟར་རྫས་སོགས་གསུམ་ལ་བརྟེན་ནས་སྐྱེས་པའི་བདེ་སྟོང་གི་ཡེ་ཤེས་དང༌། འབྲས་བུ་ཆོས་སྐུ་སྒྲུབ་བྱེད་ཀྱིནུས་པ་ཁྱད་པར་ཅན་ཞིག་ལ་ཤེར་དབང་གི་ངོ་བོར་འཇོག དབང་བཞི་པ་ནི། དབང་གསུམ་པ་དཔེར་བྱས་ནས་སྐུ་དག་པ་སྟོང་གཟུགས་ཡབ་ཡུམ་གྱི་སྐུ་དང༌། ཐུགས་དག་པ་མཆོག་ཏུ་མི་འགྱུར་བའི་བདེ་བ་ཆེན་པོ་གཉིས་ཟུང་དུ་འཇུག་པའི་ཟུང་འཇུག་གི་གོ་འཕང་དེ་ཐོབ་བྱ་དོན་གྱི་དབང་བཞི་པ་ཡིན་ནོ།། ཞེས་ཚིག་གི་སྒོ་ནས་སློབ་མ་ལ་བརྡ་སྤྲད་པས་སློབ་མས་ཟུང་འཇུག་ལ་གོ་བ་ཆགས་པ་དེ་དབང་བཞི་པ་ཚིག་དབང་གི་ངོ་བོ་ཡིན། དེ་ལྟར་གོང་དུ་བཤད་པའི་དབང་བཞི་འཐོབ་པའི་ཆ་རྐྱེན་གྱི་གཙོ་བོ་ནི། བཤེས་གཉེན་བསྟེན་ཚུལ་སྙིང་རྗེས་དྲངས་པའི་བྱང་ཆུབ་ཀྱི་སེམས་སོགས་ལམ་ཐུན་མོང་བ་ལས་ཀྱང་ཤུགས་དྲག་ལ་རྒྱུན་རིང་བ་ཞིག་དགོས། སློབ་མ་ལྷར་བསྐྱེད་པ་ལ་དབང་བསྐུར་བ་ཡིན་པས། ལྷ་ཡི་ང་རྒྱལ་དང་གསལ་སྣང་བརྟན་པོ་དགོས། དེའི་ཆེད་དུ་སློབ་མ་ལ་གཙུག་ཏོར་དང་ཅོད་པཎ། སྟོད་གཡོག་སོགས་ལྷ་ཡི་ཆས་གོས་སྦྱིན་པ་ནི་དེའི་ཆེད་དུ་ཡིན། སྔགས་ཀྱི་ཐུན་མོང་མ་ཡིན་པའི་ཁྱད་ཆོས་ཤེས་པའི་སྒོ་ནས་སྔགས་ལ་དད་པ་དང་དོན་གཉེར་ཤིན་ཏུ་བརྟན་པོ་ཞིག་དགོས། དབང་གི་རྨང་གཞི་བདེ་སྟོང་གི་ཡེ་ཤེས་ཡིན་པས། སྟོང་ཉིད་ལ་གོ་བ་གནད་དུ་འཁེལ་བ་ཞིག་དགོས་པ་བཅས་ནི་ཆ་རྐྱེན་གྱི་གཙོ་བོ་ཡིན། ཆ་རྐྱེན་གྱི་གཙོ་བོ་དེ་དག་རང་ལ་ཚང་དང་མ་ཚང་ལེགས་པར་བརྟག་ནས་ཚང་ན་དགའ་བ་སྒོམ། མ་ཚང་ན་ཚང་བའི་ཆེད་དུ་ཚོགས་གཉིས་གསོག་པ་དང་སྒྲིབ་པ་སྦྱོང་བ་ལ་འབད་དགོས། འོ་ན། ཆ་རྐྱེན་དེ་དག་མ་ཚང་ན་དུས་ཀྱི་འཁོར་ལོའི་དབང་ཞུས་པ་དོན་མེད་པ་ཡིན་ནམ་ཞེ་ན་གཏན་ནས་མ་ཡིན་ཏེ། ཞིང་གི་མཐུ་ལ་བརྟེན་པ་མན་ངག་ཡིན། ཞེས་གསུངས་པ་ལྟར། ཞིང་ཁྱད་པར་ཅན་གནས་ཕུན་སུམ་ཚོགས་པ་ཆོས་རྒྱལ་ཟླ་བཟང་པོ་ལ་སོགས་པ་སར་གནས་ཀྱི་སེམས་དཔའ་མཐའ་ཡས་པ་ཞིག་ལ་སྟོན་པ་རྡོ་རྗེ་འཆང་རང་ཉིད་དཔལ་དུས་ཀྱི་འཁོར་ལོའི་རྟེན་དང་བརྟེན་པའི་དཀྱིལ་འཁོར་ཡོངས་རྫོགས་ཀྱི་བདག་པོར་བཞེངས་ནས། དུས་ཀྱི་འཁོར་ལོའི་རྩ་རྒྱུད་གསུངས་པའི་གནས་ཁྱད་པར་ཅན་དཔལ་ལྡན་འབྲས་སྤུངས་དང༌། སྟོན་པ་ཁྱད་པར་ཅན་སེམས་འགྲེལ་སྐོར་གསུམ་གྱི་ནང་ནས་དུས་འཁོར་འགྲེལ་ཆེན་དྲི་མེད་འོད་མཛད་པ་པོ་འཇིག་རྟེན་དབང་ཕྱུག་གི་རྣམ་རོལ་རིགས་ལྡན་པདྨ་དཀར་པོ་དེ་ཉིད་མཐོན་མཐིང་རལ་བའི་ལན་བུ་དོར་ཏེ། དུས་མཐའ་འདིར་གསུམ་ལྡན་ངུར་སྨྲིག་གར་གྱི་རྣམ་པར་རོལ་བ། རྡོ་རྗེ་སློབ་དཔོན་གྱི་མཚན་ཉིད་ཡོངས་སུ་རྫོགས་པ། སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་ཞལ་སྔ་ནས་ཀྱི་ཐུགས་བསྐྱེད་སྨོན་ལམ་དང༌། ཆོས་ཕུན་སུམ་ཚོགས་པ་ཐེག་པ་ཀུན་གྱི་ཡང་རྩེ་རྣལ་འབྱོར་བླ་ན་མེད་པའི་རྒྱུད་ལ་ཕ་རྒྱུད་མ་རྒྱུད་གཉིས་ཀྱི་ཡ་གྱལ། མ་རྒྱུད་དཔལ་དུས ཀྱི་འཁོར་ལོའི་ཟབ་མོ་དབང་གི་རིམ་པ་ཁྱད་པར་ཅན་དང༌། དབང་གང་དུ་ཐོབ་པའི་རྡུལ་ཚོན་གྱི་དཀྱིལ་འཁོར་བཅས་དང༌། འཁོར་ཕུན་སུམ་ཚོགས་པ་ལུང་རྟོགས་ཀྱི་ཡོན་ཏན་ལ་དབང་འབྱོར་བའི་སྐལ་ལྡན་སེར་སྐྱ་ཕོ་མོ་མཐའ་ཡས་པ་བཅས། དེ་ལྟ་བུའི་ཞིང་ཁྱད་པར་ཅན་ལ་བརྟེན་ནས་བསོད་ནམས་རླབས་པོ་ཆེ་ཞིག་ཐོབ་པར་ཐེ་ཚོམ་མེད་དོ་ཞེས་བརྗོད་ཆོག་པ་ཡིན་ཏེ། མདོ་ལས། བསམ་མི་ཁྱབ་ལ་དད་བྱེད་པའི།། རྣམ་པར་སྨིན་པའང་བསམ་མི་ཁྱབ།། ཅེས་གསུངས་པ་ལྟར་རོ།། དཔལ་དུས་ཀྱི་འཁོར་ལོའི་བྱིས་པ་ལྟར་འཇུག་པའི་དབང་བདུན་གྱི་ངོ་སྤྲོད་ཅུང་ཟད་ཞུས་ན། དང་པོ་བྱིས་པ་སྐྱེས་མ་ཐག་ཆུས་བཀྲུ་བ་དང་མཐུན་པ་དཔལ་དུས་ཀྱི་འཁོར་ལོའི་བྱང་ཕྱོགས་སྐུ་ཡི་ཞལ་དཀར་པོའི་ཐད་དུ་སློབ་མ་སྐུ་རྡོ་རྗེར་བསྐྱེད་ནས་གཤེགས་མ་ལྔས་བུམ་དབང་བསྐུར། བུམ་ཆུ་མྱངས་པ་ལ་བརྟེན་ནས་བདེ་བ་ཆེན་པོའི་ཡེ་ཤེས་སྐྱེ། བདེ་བས་སྟོང་པ་ངེས་པས་བདེ་སྟོང་གི་ཡེ་ཤེས་ཁྱད་པར་ཅན་རྒྱུད་ལ་སྐྱེས་བྱུང་སྙམ་པ་དང༌། ཁམས་ལྔ་ཡི་དྲི་མ་སྦྱོང་བའི་ནུས་པ་ཁྱད་པར་ཅན་ཐོབ་བྱུང་སྙམ་པའི་མོས་པ་བརྟན་པོ་བྱ་དགོས། དེ་ལྟར་བུམ་ཆུ་མྱངས་པ་ལ་བརྟེན་ནས་སྐྱེས་པའི་བདེ་སྟོང་གི་ཡེ་ཤེས་དང་ཁམས་ལྔ་ཡི་དྲི་མ་སྦྱོང་བའི་ནུས་པ་ཁྱད་པར་ཅན་གཉིས་ལ་དབང་བདུན་གྱི་དང་པོ་ཆུ་དབང་གི་ངོ་བོར་འཇོག དབང་གི་དགོས་པ་ནི་དེ་ནི་བྱིས་པ་སྐྱེས་མ་ཐག་པ་མ་ཡིས་ཆུས་འཁྲུད་པ་དང་ཆོས་མཐུན་ཞིང༌། ཁམས་ལྔ་ཡི་དྲི་མ་འཁྲུད། ཡུམ་ལྔ་ལ་བརྟེན་པའི་དངོས་གྲུབ་དང་འཕྲིན་ལས་སྒྲུབ་པ་ལ་དབང༌། ཡུམ་ལྔ་ཡི་ས་བོན་རྒྱུད་ལ་འཇོག འབྲས་བུ་ས་དང་པོ་འཐོབ་པའི་ནུས་པ་ཅན་དུ་བྱས་པ་ཡིན་ནོ།། སྦྱང་གཞི་ཁམས་ལྔ་ནི། ས་ཆུ་མེ་རླུང་བཞི་དང༌། ནམ་མཁའི་ཁམས་བཅས་ལྔ་ཡིན་ལ། དབང་བསྐུར་བ་པོས་གཤེགས་མ་ལྔ་ནི། ལུས་ཀྱི་ནམ་མཁའི་ཁམས་རྣམ་པར་དག་པའི་དག་ཆ་རྡོ་རྗེ་དབྱིངས་ཀྱི་དབང་ཕྱུག་མ་ལྗང་ཁུ། ལུས་ཀྱི་རླུང་ཁམས་རྣམ་པར་དག་པའི་དག་ཆ་སྒྲོལ་མ་ནག་མོ། ལུས་ཀྱི་མེ་ཁམས་རྣམ་པར་དག་པའི་དག་ཆ་གོས་དཀར་མོ་དམར་མོ། ལུས་ཀྱི་ཆུ་ཡི་ཁམས་རྣམ་པར་དག་པའི་དག་ཆ་མཱ་མ་ཀིའ་དཀར་མོ། ལུས་ཀྱི་ས་ཡི་ཁམས་རྣམ་པར་དག་པའི་དག་ཆ་སྤྱན་མ་སེར་མོ་བཅས་ཡིན་ནོ།། གཉིས་པ་ནི། བྱིས་པ་གཙུག་ཕུད་འཇོག་པ་དང་མཐུན་པ་བྱང་ཕྱོགས་སྐུ་ཡི་ཞལ་དཀར་པོའི་ཐད་དུ་ སློབ་མ་སྐུ་རྡོ་རྗེར་བསྐྱེད་ནས། གཤེགས་པ་ལྔས་ཅོད་པཎ་གྱི་དབང་བསྐུར། ཅོད་པཎ་མགོ་ལ་བསྐོན་པ་ལ་བརྟེན་ནས་བདེ་བ་ཁྱད་པར་ཅན་སྐྱེ། བདེ་བས་སྟོང་པར་ངེས་པའི་བདེ་སྟོང་གི་ཡེ་ཤེས་ཁྱད་པར་ཅན་སྐྱེས་བྱུང་སྙམ་པ་དང༌། ཕུང་པོ་ལྔ་ཡི་དྲི་མ་སྦྱོང་བའི་ནུས་པ་ཁྱད་པར་ཅན་ཐོབ་བྱུང་སྙམ་པའི་མོས་པ་བརྟན་པོ་དགོས། དེ་ལྟར་ཅོད་པན་བསྙོན་པ་ལ་བརྟེན་ནས་སྐྱེས་པའི་བདེ་སྟོང་གི་ཡེ་ཤེས་དང༌། ཕུང་པོ་ལྔ་ཡི་དྲི་མ་སྦྱོང་བའི་ནུས་པ་ཁྱད་པར་ཅན་གཉིས་ལ་དབང་གཉིས་པ་ཅོད་པན་གྱི་དབང་གི་ངོ་བོར་འཇོག དབང་གི་དགོས་པ་ནི། བྱིས་པ་གཙུག་ཕུད་བཞག་པ་དང་ཆོས་མཐུན། ཕུང་པོ་ལྔ་ཡི་དྲི་མ་འཁྲུད། སངས་རྒྱས་ལྔ་ཡི་སྒོ་ནས་དངོས་གྲུབ་སྒྲུབ་པ་ལ་དབང༌། སངས་རྒྱས་ལྔ་ཡི་ས་བོན་རྒྱུད་ལ་བཞག འབྲས་བུ་ས་གཉིས་པ་ཐོབ་པའི་ནུས་པ་ཅན་དུ་བྱས་པ་ཡིན་ནོ།། སྦྱང་གཞི་ཕུང་པོ་ལྔ་ནི། གཟུགས། ཚོར་བ། འདུ་བྱེད། འདུ་ཤེས། རྣམ་ཤེས་ཀྱི་ཕུང་པོ་བཅས་ལྔའོ།། དབང་བསྐུར་བ་པོས་གཤེགས་པ་ལྔ་ནི། རྣམ་ཤེས་ཀྱི་ཕུང་པོ་རྣམ་པར་དག་པའི་དག་ཆ་མི་བསྐྱོད་པ་ལྗང་ཁུ། འདུ་བྱེད་ཀྱི་ཕུང་པོ་རྣམ་པར་དག་པའི་དག་ཆ་དོན་གྲུབ་ནག་པོ། ཚོར་བའི་ཕུང་པོ་རྣམ་པར་དག་པའི་དག་ཆ་རིན་འབྱུང་དམར་པོ། འདུ་ཤེས་ཀྱི་ཕུང་པོ་རྣམ་པར་དག་པའི་དག་ཆ་འོད་དཔག་མེད་དཀར་པོ། གཟུགས་ཀྱི་ཕུང་པོ་རྣམ་པར་དག་པའི་དག་ཆ་རྣམ་སྣང་སེར་པོ་བཅས་ཡིན། དབང་གསུམ་པ་ནི། བྱིས་པ་རྣ་བ་འབུག་པ་དང་ཆོས་མཐུན་པ། དཔལ་དུས་ཀྱི་འཁོར་ལོའི་ལྷོ་ཕྱོགས་སུ་གསུང་གི་ཞལ་དམར་པོའི་ཐད་དུ་སློབ་མ་གསུང་རྡོ་རྗེར་བསྐྱེད་ནས་ལྷ་མོ་ནུས་མ་བཅུས་དར་དཔྱངས་ཀྱི་དབང་བསྐུར། དར་དཔྱངས་མགོ་ལ་རེག་པ་ལ་བརྟེན་ནས་བདེ་བ་ཁྱད་པར་ཅན་སྐྱེ་ བདེ་བའི་སྟོང་པར་ངེས་པའི་བདེ་སྟོང་གི་ཡེ་ཤེས་ཁྱད་པར་ཅན་སྐྱེས་བྱུང་སྙམ་པ་དང༌། རླུང་བཅུའི་དྲི་མ་སྦྱོང་བའི་ནུས་པ་ཁྱད་པར་ཅན་ཐོབ་བྱུང་སྙམ་པའི་མོས་པ་བརྟན་པོ་དགོས། དར་དཔྱངས་མགོ་ལ་རེག་པ་ལ་བརྟེན་ནས་སྐྱེས་པའི་བདེ་སྟོང་གི་ཡེ་ཤེས་དང༌། རླུང་བཅུའི་དྲི་མ་སྦྱོང་བའི་ནུས་པ་ཁྱད་པར་ཅན་གཉིས་ལ་དབང་གསུམ་པ་དར་དཔྱངས་ཀྱི་དབང་གི་ངོ་བོར་འཇོག དབང་གི་དགོས་པ་ནི། བྱིས་པའི་རྣ་བ་འབུག་ཅིང་རྒྱན་འདོགས་པ་དང་ཆོས་མཐུན། རླུང་བཅུའི་དྲི་མ་འཁྲུད་ཅིང་ལས་རུང་དུ་བྱས། ནུས་མ་བཅུ་ཡི་སྒོ་ནས་དངོས་གྲུབ་སྒྲུབ་པ་ལ་དབང༌། ཕ་རོལ་ཏུ་ཕྱིན་པ་བཅུའི་ནུས་པ་འཇོག་ཅིང༌། འབྲས་བུ་ས་གསུམ་པ་འཐོབ་པའི་ནུས་པ་ཅན་དུ་བྱས་པ་ཡིན་ནོ།། སྦྱང་གཞི་རླུང་བཅུ་ཡི་ངོས་འཛིན་ནི། མཉམ་གནས། ཐུར་སེལ། གྱེན་རྒྱུ། སྲོག་འཛིན། ཁྱབ་བྱེད་དང་བཅས་རྩ་བའི་རླུང་ལྔ། ཀླུ་དང་རུས་སྦལ། རྩངས་པ། ལྷས་སྦྱིན། ནོར་ལས་རྒྱལ་བཅས་ཡན་ལག་གི་རླུང་ལྔའོ།། རླུང་མཉམ་གནས་དང་རླུང་རུས་སྦལ་རྣམ་པར་དག་པའི་དག་ཆ་འབར་མ་ནག་མོ་དང་དུབ་མ་ནག་མོ་གཉིས། རླུང་གྱེན་རྒྱུ་དང་རྩངས་པ་རྣམ་པར་དག་པའི་དག་ཆ་དམར་མོ་འབར་མ་དང་སྨིག་རྒྱུ་མ་དམར་མོ་གཉིས། རླུང་ཁྱབ་བྱེད་དང་ལྷས་སྦྱིན་རྣམ་པར་དག་པའི་དག་ཆ་དཀར་མོ་འབར་མ་དང་མཁའ་སྣང་མ་གཉིས། རླུང་ཀླུ་དང་ནོར་ལས་རྒྱལ་གཉིས་རྣམ་པར་དག་པའི་དག་ཆ་སེར་མོ་འབར་མ་དང་མར་མེ་མ་གཉིས། རླུང་སྲོག་འཛིན་རྣམ་པར་དག་པའི་དག་ཆ་རྡོ་རྗེ་དབྱིངས་ཀྱི་དབང་ཕྱུག་མ་ལྗང་ཁུ། རླུང་ཐུར་སེལ་རྣམ་པར་དག་པའི་དག་ཆ་སྣ་ཚོགས་ཡུམ་སྔོན་མོ་བཅས་ཡིན། དབང་བཞི་པ་ནི། བྱིས་པ་དགོད་ཅིང་སྨྲ་བ་དང་མཐུན་པར་ལྷོ་ཕྱོགས་སུ་གསུང་ཞལ་དམར་པོའི་ཐད་དུ་སློབ་མ་གསུང་རྡོ་རྗེར་བསྐྱེད་ནས་དཔལ་དུས་ཀྱི་འཁོར་ལོ་ཡབ་ཡུམ་གཉིས་ཀྱི་རྡོར་དྲིལ་གྱི་དབང་བསྐུར་བས་བདེ་བ་ཆེན་པོ་སྐྱེ། བདེ་བས་སྟོང་པར་ངེས་པའི་བདེ་སྟོང་གི་ཡེ་ཤེས་ཁྱད་པར་ཅན་སྐྱེས་བྱུང་སྙམ་པ་དང༌། རྩ་རོ་རྐྱང་གཉིས་ཀྱི་དྲི་མ་སྦྱོང་བའི་ནུས་པ་ཁྱད་པར་ཅན་ཐོབ་བྱུང་སྙམ་པའི་མོས་པ་བརྟན་པོ་བྱ་དགོས། དབང་གི་དགོས་པ་ནི། དེ་ནི་བྱིས་པ་དགོད་པ་དང་སྨྲ་བར་བྱེད་པ་དང་ཆོས་མཐུན། རྩ་རོ་རྐྱང་གཉིས་ཀྱི་དྲི་མ་འཁྲུད་ཅིང༌། རོ་རྐྱང་གཉིས་དབུ་མར་བསྡོམ་པའི་ནུས་པ་བཞག ཐུགས་མི་འགྱུར་བའི་བདེ་བ་ཆེན་པོ་དང་གསུང་རྣམ་པ་ཐམས་ཅད་པའི་ས་བོན་འཇོག་ཅིང༌། གཙོ་བོ་ཡབ་ཡུམ་གྱི་དངོས་གྲུབ་སྒྲུབ་པ་ལ་དབང་བར་བྱས་ཉི་ཟླ་གཅིག་ཏུ་དག་ཅིང་ས་བཞི་པ་ཐོབ་པའི་ནུས་པ་ཁྱད་པར་ཅན་དུ་བྱེད་པ་ཡིན་ནོ།། སྦྱང་གཞི་རྩ་རོ་རྐྱང་གཉིས་དང་དབང་བསྐུར་བ་པོ་ནི་གཙོ་བོ་ཡབ་ཡུམ་གཉིས་ཡིན་ནོ།། ལྔ་པ་ནི། བྱིས་པས་འདོད་ཡོན་ལ་ལོངས་སྤྱོད་པ་དང་མཐུན་པ། དཔལ་དུས་ཀྱི་འཁོར་ལཱུའི་རྩ་ཞལ་སྔོན་པོ་ཐུགས་ཀྱི་ཞལ་གྱི་ཐད་ཀར་སློབ་མ་ཐུགས་རྡོ་རྗེར་བསྐྱེད་ནས་སེམས་དཔའ་དང་སེམས་མས་མཐེ་བོའི་རྡོ་རྗེ་བརྟུལ་ཞུགས་ཀྱི་དབང་བསྐུར་བས་བདེ་བ་ཁྱད་པར་ཅན་སྐྱེས། བདེ་བའི་སྟོང་པར་ངེས་པའི་བདེ་སྟོང་གི་ཡེ་ཤེས་ཁྱད་པར་ཅན་སྐྱེས་བྱུང་སྙམ་པ་དང༌། སློབ་མའི་དབང་པོ་ལྔ་དང་ཡུལ་གཟུགས་སོགས་ལྔ་ཡི་དྲི་མ་སྦྱོང་བའི་ནུས་པ་ཁྱད་པར་ཅན་ཐོབ་བྱུང་སྙམ་པའི་མོས་པ་བརྟན་པོ་བྱ་དགོས། དབང་གི་དགོས་པ་ནི། བྱིས་པ་འདོད་ཡོན་ལྔ་ལ་ལོངས་སྤྱོད་པ་དང་ཆོས་མཐུན། དབང་པོ་དང་ཡུལ་གྱི་དྲི་མ་འཁྲུད། སེམས་དཔའ་སེམས་མའི་དངོས་གྲུབ་སྒྲུབ་ཅིང༌། རང་བཞིན་ཤེས་པའི་སྒོ་ནས་འདོད་ཡོན་ལྔ་ལ་ལོངས་སྤྱོད་པ་ལ་དབང༌། རྡོ་རྗེ་སྐྱེ་མཆེད་འགྲུབ་པ་དང༌། འབྲས་བུ་ས་ལྔ་པ་ཐོབ་པའི་ནུས་པ་ཁྱད་པར་ཅན་དུ་བྱེད་པ་ཡིན་ནོ།། སྦྱང་གཞི་ནི། མིག་སོགས་དབང་པོ་ལྔ་དང་གཟུགས་སོགས་ཡུལ་ལྔ་བཅས་ཡིན། དབང་བསྐུར་བ་པོ་ནི། དབང་ལྔ་ཡུལ་ལྔ་དང་བཅས་པ་རྣམ་པར་དག་པའི་དག་ཆ་སེམས་དཔའ་དང་སེམས་མ་རྣམས་ཡིན་ནོ།། དབང་དྲུག་པ་ནི། བྱིས་པར་མིང་འདོགས་པ་དང་མཐུན་པར། ཤར་ཕྱོགས་སུ་རྩ་ཞལ་སྔོན་པོ་ཐུགས་ཀྱི་ཞལ་གྱི་ཐད་ཀར་སློབ་མ་ཐུགས་རྡོ་རྗེར་བསྐྱེད་ནས་ཁྲོ་བོ་དང་ཁྲོ་མོས་གདུ་བུའི་དབང་བསྐུར་བས་བདེ་བ་ཆེན་པོ་སྐྱེ། བདེ་བས་སྟོང་པར་ངེས་པའི་བདེ་སྟོང་གི་ཡེ་ཤེས་ཁྱད་པར་ཅན་སྐྱེ་བྱུང་སྙམ་པ་དང༌། སློབ་མའི་ལས་དབང་ལྔ་ཡི་བྱ་བ་དང་བཅས་པའི་དྲི་མ་སྦྱོང་བའི་ནུས་པ་ཁྱད་པར་ཅན་ཐོབ་བྱུང་སྙམ་པའི་མོས་པ་བྱ་དགོས། དབང་གི་དགོས་པ་ནི། དེ་ནི་བྱིས་པ་ལ་མིང་འདོགས་པ་དང་ཆོས་མཐུན། ལས་དབང་བྱ་བ་དང་བཅས་པའི་དྲི་མ་འཁྲུད། ཁྲོ་བོ་ཁྲོ་མོའི་དངོས་གྲུབ་སྒྲུབ་པ་ལ་དབང༌། ཚད་མེད་བཞིས་བདུད་བཞི་འཇོམས་པ་དང༌། འབྲས་བུ་ས་དྲུག་པ་ཐོབ་པའི་སྐལ་བ་ཅན་དུ་བྱེད་པ་ཡིན་ནོ།། སྦྱང་གཞི་ལས་དབང་ནི། དྲི་ཆུའི་དབང་པོ་དང༌། ཁ་ཡི་དབང་པོ་དང༌། ལག་པའི་དབང་པོ་དང༌། རྐང་པའི་དབང་པོ་དང༌། བཤང་བའི་དབང་པོ་དང༌། མཆོག་གི་དབང་པོ་བཅས་ལས་དབང་དྲུག་དང༌། དེ་དག་གི་བྱ་བ་དྲུག་ནི། དྲི་ཆུ་འཛག་པ་དང༌། བྱ་བ་བརྗོད་པ་དང༌། ལེན་པ་དང༌། འགྲོ་བ་དང༌། བཤང་བ་འདོར་བ་དང༌། ཁུ་བ་འཕོ་བ་བཅས་ཡིན་ནོ།། དབང་བསྐུར་བ་པོ་ནི། ལས་དབང་དང་དེ་དག་གི་བྱ་བ་དང་བཅས་པ་རྣམ་པར་དག་པའི་དག་ཆ་ཁྲོ་བོ་དང་ཁྲོ་མོ་རྣམས་ཡིན་ནོ།། དབང་བདུན་པ་ནི། བྱིས་པར་ཕ་མ་སོགས་ཀྱིས་ཡི་གེ་འབྲི་ཀློག་སློབ་པ་དང་མཐུན་པ། དཔལ་དུས་ཀྱི་འཁོར་ལོའི་ནུབ་ཕྱོགས་རྒྱབ་ཞལ་སེར་པོའི་ཐད་ཀར་སློབ་མ་ཡེ་ཤེས་རྡོ་རྗེར་བསྐྱེད་ནས་རྗེས་གནང་དང་དེ་ཡི་འདོགས་སྔགས་གཏད་སོགས་བཞི་ཡི་དབང་བསྐུར་བས་བདེ་བ་ཁྱད་པར་ཅན་སྐྱེ། བདེ་བས་སྟོང་པར་ངེས་པའི་བདེ་སྟོང་གི་ཡེ་ཤེས་ཁྱད་པར་ཅན་སྐྱེ་བྱུང་སྙམ་པ་དང༌། ལུས་ངག་ཡིད་གསུམ་ཡིད་ཤེས་དང་བཅས་པའི་དྲི་མ་སྦྱོང་བའི་ནུས་པ་ཁྱད་པར་ཅན་ཐོབ་བྱུང་སྙམ་པའི་མོས་པ་དགོས། དབང་གི་དགོས་པ་ནི། དེ་ནི་བྱིས་པ་ལ་ཕ་ཡིས་ཀློག་ལ་སོགས་པ་སྟེར་བར་བྱེད་པ་དང་ཆོས་མཐུན། བྱིས་པ་སྐྱེས་མ་ཐག་ཡེ་ཤེས་ཀྱི་རླུང་རྒྱུ་བར་བྱེད་པ་བཞིན་རྗེས་གནང་འདོགས་བཅས་ཀྱི་དབང་གིས་ཡེ་ཤེས་ཀྱི་དྲི་མ་འཁྲུད། རྡོ་རྗེ་སེམས་དཔའི་ས་བོན་འཇོག་པའི་ཕྱིར་ཡེ་ཤེས་ཀྱི་ཁམས་སྦྱོང་བར་བྱེད་ཅིང༌། འབྲས་བུ་ས་བདུན་པ་ཐོབ་པའི་ནུས་པ་ཁྱད་པར་ཅན་དུ་བྱེད་པ་ཡིན་ནོ།། སྦྱང་གཞི་ལུས་ངག་ཡིད་གསུམ་ཡིད་ཤེས་དང་བཅས་པ་ཡིན། དངོས་སུ་དབང་བསྐུར་པ་པོ་ནི། རྡོ་རྗེ་སློབ་དཔོན་ཡིན་ནོ།། དེ་ལྟར་བྱིས་པ་ལྟར་འཇུག་པའི་དབང་བདུན་ཐུན་མོང་གི་དགོས་པ་ནི། དེ་ལྟར་རྡུལ་ཚོན་གྱི་དཀྱིལ་འཁོར། རས་བྲིས་ཀྱི་དཀྱིལ་འཁོར། ལུས་ཀྱི་དཀྱིལ་འཁོར། བསམ་གཏན་གྱི་དཀྱིལ་འཁོར་བཅས་དཀྱིལ་འཁོར་བཞི་ལས་རྡུལ་ཚོན་གྱི་དཀྱིལ་འཁོར་དུ་དབང་བདུན་པོ་ཐམས་ཅད་ལ་ཆུ་ཡི་བྱ་བ་རྗེས་སུ་འགྲོ་བའི་ཕྱིར། ཆུའི་དབང་ཞེས་པ་དེ་ཉིད་ཐོབ། སྡིག་པའི་དྲི་མ་འཁྲུད། ལམ་བསྐྱེད་པའི་རིམ་པ་སྒོམ་པ་དང་འོག་མིན་གྱི་མཐར་ཐུག་པའི་འཇིག་རྟེན་པའི་དངོས་གྲུབ་སྒྲུབ་པ་ལ་དབང༌། བསོད་ནམས་ཀྱི་ཚོགས་ཀྱི་ནུས་པ་འཇོག བསྐྱེད་རིམ་དང་འབྲེལ་བའི་སྤྱོད་པ་དང་གྲོལ་བ་སྟེར་བ་བཅས་གསང་སྔགས་ཀྱི་དགེ་བསྙེན་དུ་གྱུར་ཏེ། མཐོང་བའི་ཆོས་ལ་དཀྱིལ་འཁོར་གྱི་འཁོར་ལོ་མངོན་དུ་བྱས་ན་ཚེ་འདིར་ས་བདུན་གྱི་དབང་ཕྱུག་ཏུ་འགྱུར་ཞིང༌། མཐོང་བའི་ཆོས་ལ་དེ་ལྟར་མི་བྱེད་ཅིང་མི་དགེ་བ་བཅུ་དང་བྲལ་བར་གནས་ན་སྐྱེ་བ་བདུན་གྱིས་ས་བདུན་གྱི་དབང་ཕྱུག་ཐོབ། གོང་མ་ཀུན་རྫོབ་འཇིག་རྟེན་པའི་དབང་ལ་བཞི་ལས། དང་པོ་བུམ་དབང་ནི། རང་ཉིད་ཀྱིས་སྒོམ་པའི་ཕྱག་རྒྱ་མ་དཀར་མོ་ལ་འཁྱུད་པ་དང༌། དེའི་ནུ་མ་ལ་རེག་པ་སྒོམ་པ་སོགས་ལས་བདེ་བ་ཆེན་པོའི་ཡེ་ཤེས་སྐྱེ། བདེ་བའི་སྟོང་བར་ངེས་པའི་བདེ་སྟོང་གི་ཡེ་ཤེས་ཁྱད་པར་ཅན་སྐྱེ་བྱུང་སྙམ་པ་དང༌། རྒོད་པའི་འདོད་ཆགས་ལམ་དུ་བྱེད་ནུས་པའི་ནུས་པ་ཁྱར་པར་ཅན་སྐྱེ་བྱུང་སྙམ་པའི་མོས་པ་བརྟན་པོ་དགོས། དབང་གཉིས་པ་གསང་དབང་ནི། བླ་མ་ཡབ་ཡུམ་སྙོམས་པར་བཞུགས་པའི་བྱང་སེམས་དཀར་དམར་སློབ་མས་མྱངས་པ་ལ་བརྟེན་ནས་བདེ་བ་ཆེན་པོའི་ཡེ་ཤེས་སྐྱེས། བདེ་བའི་སྟོང་བར་ངེས་པའི་བདེ་སྟོང་གི་ཡེ་ཤེས་ཁྱད་པར་ཅན་སྐྱེས་བྱུང་སྙམ་པ་དང༌། བལྟ་བའི་བདེ་བ་ལམ་དུ་བྱེད་ནུས་པའི་ནུས་པ་ཁྱར་པར་ཅན་སྐྱེ་བྱུང་སྙམ་པའི་མོས་པ་བརྟན་པོ་དགོས། དབང་གསུམ་པ་ཤེར་དབང་ནི། རང་ཉིད་ཀྱིས་བསྒོམ་པའི་ལྷ་མོ་དང་སྙོམས་པར་ཞུགས་པ་ལས་བདེ་བ་ཁྱད་པར་ཅན་སྐྱེ། བདེ་བའི་སྟོང་བར་ངེས་པའི་བདེ་སྟོང་གི་ཡེ་ཤེས་ཁྱད་པར་ཅན་སྐྱེས་བྱུང་སྙམ་པ་དང༌། ལག་བཅང་གི་བདེ་བ་ལམ་དུ་བྱེད་ནུས་པའི་ནུས་པ་ཁྱར་པར་ཅན་སྐྱེ་བྱུང་སྙམ་པའི་མོས་པ་བརྟན་པོ་དགོས། དབང་བཞི་པ་ནི། དབང་གསུམ་པའི་སྐབས་ཀྱི་བདེ་སྟོང་གི་ཡེ་ཤེས་དེ་ཉིད་དགའ་བ་བཞི་ཡི་ནང་ནས་ལྷན་སྐྱེས་ཀྱི་དགའ་བ་ཡིན་ནོ་ཞེས་སློབ་མ་ལ་བརྡ་སྤྲད་པས་སློབ་མས་བརྡ་འཕྲོད་པ་ལ་བརྟེན་ནས་བདེ་བ་ཆེན་པོའི་ཡེ་ཤེས་སྐྱེ། བདེ་བའི་སྟོང་བར་ངེས་པའི་བདེ་སྟོང་གི་ཡེ་ཤེས་ཁྱད་པར་ཅན་སྐྱེ་བྱུང་སྙམ་པ་དང༌། དབང་པོ་གཉིས་སྦྱོར་གྱི་བདེ་བ་ལམ་དུ་བྱེད་ནུས་པའི་ནུས་པ་ཁྱད་པར་ཅན་ཐོབ་བྱུང་སྙམ་པའི་མོས་པ་དགོས། གོང་ཆེན་དོན་དམ་འཇིག་རྟེན་ལས་འདས་པའི་དབང་ལ་བཞི་ལས། དང་པོ་བུམ་དབང་ནི། རང་ཉིད་ཀྱིས་བསྒོམ་པའི་ཕྱག་རྒྱ་མ་བཅུའི་ནུ་མ་ལ་རེག་པ་ལས་རེག་པས་ཁམས་དཀར་པོ་གཙུག་ཏོར་ནས་དཔྲལ་བར་བབས་པས་དགའ་བ་ཁྱད་པར་ཅན་སྐྱེ། དགའ་བའི་སྟོང་པར་ངེས་པས་བདེ་སྟོང་གི་ཡེ་ཤེས་ཁྱད་པར་ཅན་སྐྱེ་བྱུང་སྙམ་པའི་མོས་པ་དགོས། གཉིས་པ་གསང་དབང་ནི། ཕྱག་རྒྱ་མ་དགུ་དང་བླ་མ་སྙོམས་པར་བཞུགས་པའི་བྱང་སེམས་དཀར་དམར་མྱང་བའི་ཁམས་དཀར་པོ་དཔྲལ་བ་ནས་སྙིང་ཀའི་བར་བབས་པས་མཆོག་དགའ་ཁྱད་པར་ཅན་སྐྱེ། མཆོག་དགའི་སྟོང་བར་ངེས་པས་བདེ་སྟོང་གི་ཡེ་ཤེས་ཁྱད་པར་ཅན་སྐྱེ་བྱུང་སྙམ་པའི་མོས་པ་དགོས། གསུམ་པ་ཤེར་དབང་ནི། ཕྱག་རྒྱ་མ་དགུ་དང་སློབ་མ་སྙོམས་པར་བཞུགས་པའི་ཁམས་དཀར་པོ་སྙིང་ཀ་ནས་གསང་གནས་ཀྱི་བར་བབས་པས་ཁྱད་པར་གྱི་དགའ་བ་སྐྱེ༌། ཁྱད་དགའི་སྟོང་པར་ངེས་པས་བདེ་སྟོང་གི་ཡེ་ཤེས་ཁྱད་པར་ཅན་སྐྱེ་བྱུང་སྙམ་པའི་མོས་པ་དགོས། དབང་བཞི་པ་ཚིག་དབང་ནི། མི་འགྱུར་བའི་བདེ་བ་ཆེན་པོའི་རྣམ་ཀུན་མཆོག་ལྡན་གྱི་སྟོང་བ་ཉིད་རྟོགས་པའི་ཐུགས་དང་སྟོང་གཟུགས་དཔལ་དུས་ཀྱི་འཁོར་ལོ་ཡབ་ཡུམ་དུ་ཤར་བ་ངོ་བོ་གཅིག་པའི་གོ་བ་དཔྱིས་ཕྱིན་པ་སློབ་དཔོན་གྱི་བརྡ་སྤྲད་དེ། སློབ་མས་བརྡ་འཕྲོད་པ་ནི་ངེས་དོན་འཇིག་རྟེན་ལས་འདས་པའི་དབང་བཞི་པ་ཡིན་ནོ།། རྡོ་རྗེ་སློབ་དཔོན་བདག་པོ་ཆེན་པོའི་དབང་ལ་ལྔ། སྔོན་འགྲོ་དམ་བཅའ་བ། གསོལ་བ་བཏབ་ཅིང་དབང་སྟེགས་ལ་བཞག་པ། ཁྱིམ་པ་དགེ་ཚུལ་དགེ་སློང་རྣམས་ལ་བྱིས་པ་ལྟར་འཇུག་པའི་དབང་བདུན་པོ་སོ་སོར་བསྐུར་ཞིང་རྗེས་གནང་བྱིན་པ། བྱིས་པ་ལྟར་འཇུག་པའི་དབང་བདུན་ཐོབ་པས་དགེ་བསྙེན། བུམ་དབང་ཐོབ་པས་དགེ་ཚུལ་གསང་དབང་ཐོབ་པས་དགེ་སློང༌། ཤེར་དབང་ཐོབ་པས་གནས་བརྟན་རྒན་པོ། དབང་བཞི་ཐོབ་པས་སྐྱེ་རྒུའི་བདག་པོར་ངོ་སྤྲད་ནས་དབང་གི་རྣམ་དག་བསྟན་པ། སྐུ་གསུང་ཐུགས་རྡོ་རྗེའི་དབང་བསྐུར་བའི་རྗེས་སུ་རྡོ་རྗེ་སློབ་དཔོན་གྱི་དམ་ཚིག་བསྟན་པ་སོགས་ལ་བརྟེན་ནས་རྡོ་རྗེ་སློབ་དཔོན་བདག་པོ་ཆེན་པོའི་དབང་ཐོབ་བྱུང་སྙམ་པའི་མོས་པ་བརྟན་པོ་དགོས། དེ་ལྟར་དུས་ཀྱི་འཁོར་ལོའི་དཀྱིལ་འཁོར་དུ་དབང་ཡོངས་སུ་རྫོགས་པར་བསྐུར་བའི་རྡོ་རྗེ་སློབ་དཔོན་ནི། དཀྱིལ་འཁོར་ཐམས་ཅད་དུ་དབང་བསྐུར་བར་འགྱུར་ཞིང༌། རྒྱུད་ཐམས་ཅད་ཀྱི་སྟོན་པ་པོ་དང༌། སྔགས་ཐམས་ཅད་ཀྱི་རྗེས་སུ་གནང་བ་སྦྱིན་པ་པོ་དང༌། དངོས་གྲུབ་ཐམས་ཅད་ཀྱི་སྒྲུབ་པ་པོར་འགྱུར་བ་ཡིན་ནོ།། དེ་ལྟར་དུས་འཁོར་དབང་ཞུ་བ་པོ་རྣམས་ལ་རེ་སྐུལ་ཞུ་རྒྱུར། ལམ་ཐག་རིང་པོ་ནས་ལམ་གྲོན་དང་དཀའ་ངལ་ལ་མ་འཛེམས་པར་དུས་འཁོར་གསུང་ཆོས་ཞུ་བར་ཕེབས་པའི་དགོས་དོན་སྙིང་པོ་ཤིན་ཏུ་རྙེད་པར་དཀའ་བའི་གོ་སྐབས་བཟང་པོ་འདི་འདྲ་ཆུད་ཟོས་སུ་མ་བཏང་བར། བླ་མའི་གསུང་ཆོས་ཀྱི་དོན་གོ་མིན་ལ་མ་ལྟོས་པར་གཟབ་གཟབ་བྱས་ནས་ཉན་དགོས་པ་ཧ་ཅང་གལ་ཆེན་པོ་ཡིན། དེའི་ཕྱིར་བཅོམ་ལྡན་འདས་ཀྱིས། ཆོས་ནམ་གསུངས་པའི་སྐབས་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་ཅེས་ནན་ཏན་ཆེན་པོ་མཛད་ཡོད། ཇི་ལྟར་གཟབ་གཟབ་ཀྱི་ཉན་པ་དེ་ཙམ་གྱིས་བསོད་ནམས་ཆེན་པོ་ཐོབ་པ་སྨྲོས་མ་དགོས་པ་ནན་སྐུལ་ཞུ་རྒྱུ་ཡིན།།
