༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུས་སོང་།

དེ་ཡང་། གོང་ཚེས་ཉིན་གྱི་སྔ་དྲོ་ཆུ་ཚོད་༨།༢༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸རྒྱལ་བའི་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་བསྒྱུར་བསྐྱངས་སྐབས། བརྟན་བཞུགས་འབུལ་མཁན་ཚོགས་པ་ཁག་གསུམ་གྱི་འཐུས་མི་ཚོས་དྲུག་ནས་སྤོས་སྣེས་མདུན་བསུ་ཞུས་སོང་། བོད་ཀྱི་བུད་མེད་ལྷན་ཚོགས་ཀྱི་ཚོགས་མི་དང་། བོད་ཀྱི་རྒྱལ་ས་ལྷ་སའི་མཐུན་གྲོགས་རྫོང་ཁག་བརྒྱད་ཀྱི་མི་མང་། ཌལ་ཧོར་སློབ་ཟུར་གཙོས་པའི་བོད་མི་རྣམས་ཀྱིས་ལག་ཏུ་ཁ་བཏགས་བཟུང་ནས་དགའ་དད་སྤྲོ་གསུམ་ཐོག་ནས་༸གོང་ས་༸རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་སོང་། དེ་ནས་༸གོང་ས་མཆོག་གཙུག་ལག་ཁང་གི་བཞུགས་ཁྲིར་ཞབས་སོར་འཁོད་རྗེས་བརྟན་བཞུགས་ཀྱི་དབུ་བཞུགས་ཟམ་གདོང་རིན་པོ་ཆེ་མཆོག་གིས་༸གོང་ས་མཆོག་ལ་མཇལ་དར་རྐྱང་འབུལ་ཞུས་རྗེས་བརྟན་བཞུགས་ཆོ་ག་མུ་མཐུད་སོང་།

དེ་ནས་ཚོགས་པ་ཁག་གསུམ་གྱི་མི་འཐུས་༡༥ ནས་༸གོང་ས་མཆོག་ལ་མཇལ་ཁ་ཞུས་རྗེས། བོད་ཀྱི་ཟློས་གར་ཚོགས་པའི་ན་གཞོན་ཕོ་མོ་ཁག་གཅིག་གིས་སྐུ་ཚེ་བརྟན་པར་བསྟོད་གཞས་གཟིགས་འབུལ་ཞུས་ཤིང་། བཙུན་མ་ཁག་ཅིག་གིས་གསོལ་འདེབས་ཚིགས་བཅད་སྐྱོར་གནང་སོང་།

དེའི་རྗེས། ༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩོལ་དོན། དེ་རིང་བརྟན་བཞུགས་དང་འབྲེལ་བའི་ཐོག་ནས་ཁྱོད་ཚོ་ཚང་མས་གང་ལྟར་༸རྒྱལ་བ་བསྟན་འཛིན་རྒྱ་མཚོ་ཟེར་དུས་དངོས་ཡོད་གནས་ཚུལ་ལ་བོད་ཀྱི་བསྟན་སྲིད་དང་། ཆོལ་ཁ་གསུམ་གྱི་གནས་ཚུལ་ཚང་མར་ཕན་ཐོགས་བྱེད་ཐུབ་པ་ཞིག་ངོས་ཀྱི་ལས་དང་སྨོན་ལམ་གྱིས་ཆགས་ཡོད། དེར་བརྟེན། ༸རྒྱལ་དབང་སྐུ་ཚེ་ཞབས་པད་བརྟན་པར་གྱིས་ཞེས་སྨོན་ལམ་རྒྱག་པ་དེ་ནི་བོད་བསྟན་སྲིད་ཀྱི་དོན་ལ་འབྲེལ་བ་ཡོད་པ་ཞིག་ཆགས་ཡོད་པ་རེད། ངོས་རང་ལ་མཚོན་ནའང་ཚེ་རབས་མང་པོའི་ལས་བསགས་ནས་ད་ལྟའི་དུས་ཚོད་ཧ་ཅང་ཁག་པོའི་སྐབས་འདིར་ལས་དང་སྨོན་ལམ་གྱི་སྟོབས་ཀྱིས་བོད་བསྟན་སྲིད་ཀྱི་དོན་བྱེད་མཁན་གྱི་སྐྱེ་གནས་ཤིག་བླངས་ཤིང་། ཁ་ནས་འགྲེལ་བཤད་རྒྱག་དགོས་བྱུང་ན་ཡག་ཐག་ཆོད་རྒྱག་མཁན་དང་། སེམས་ཁམས་རིག་པའི་སྐོར་ལ་ཆ་བཞག་ན་དེང་སང་ཚན་རིག་པ་དང་མཉམ་དུའང་གོ་བསྡུར་ཡག་པོ་བྱེད་ཐུབ་མཁན་ཞིག་ཆགས་པ་རེད། ངོས་རང་དེ་ལྟ་བུའི་ལས་དང་སྨོན་ལམ་གྱི་ཐོག་ནས་མདོ་སྨད་པ་ལྷ་མོ་དོན་གྲུབ་ཟེར་བ་མི་གོ་ཆོད་པ་ཞིག་སྐྱེས་པ་དེ་ལྟར་རེད།

ཁོང་གིས་མུ་མཐུད་ནས་གསུང་དོན། ད་ལྟ་ཕན་ཆད་དུ་བོད་བསྟན་གྱི་དོན་དུ་གང་ཡོང་ཅི་ཡོང་བྱས་པ་ཡིན་ལ། ངོས་ཀྱི་མི་ཚེ་འདིར་བོད་བསྟན་སྲིད་ཀྱི་དོན་དུ་ཕན་ཐོགས་ངེས་ཅན་ཞིག་བྱུང་ཡོད་པ་རེད། དེང་སང་རྒྱ་ནག་འགྱུར་བ་འགྲོ་བཞིན་འདུག ངོས་ཀྱི་བསམ་བློའི་ཐོག་ལ་རྒྱ་ནག་ཏུ་དོ་སྣང་ཆེན་པོ་བྱེད་མཁན་ཡོང་གི་འདུག གཉིས་ནས་རྒྱ་ནག་ཏུ་ནང་པའི་ཆོས་ལ་དོ་སྣང་བྱེད་མཁན་ཇེ་མང་ཇེ་མང་དུ་འགྲོ་བཞིན་ཡོད་པ་རེད། ངོས་ཀྱི་ལས་དང་སྨོན་ལམ་གྱི་ཐོག་ནས་བོད་བསྟན་སྲིད་ཀྱི་དོན་དང་། རྒྱ་ནག་མི་མང་ལ་ཕན་ཐོགས་བྱེད་ཐུབ་པ་ཕལ་ཆེར་གསལ་བོ་འདུག སངས་རྒྱས་བཅོམ་ལྡན་འདས་ཀྱི་དགོངས་པ་དང་མཐུན་པ་ཞིག་ལ་ངོས་ཀྱིས་ཧུར་ཐག་བྱེད་རྒྱུ་ཡིན། བོད་རྒྱ་ཆེའི་མི་མང་གི་ལྷག་བསམ་དང་སྙིང་སྟོབས་ཞུམ་པ་མེད་པར་ད་ལྟ་ཕན་ཆད་ལ་ཚང་མས་ཧུར་ཐག་བྱས་པ་རེད། ད་དུང་ཡང་ཚང་མས་ཧུར་ཐག་གནང་རོགས་ཞེས་ཞུ་རྒྱུ་ཡིན། ཞེས་གསུངས་སོང་།

དེ་ནས་༸གོང་ས་མཆོག་གིས་ངོས་རང་ལས་དང་སྨོན་གྱི་དབང་གིས་འདི་འདྲ་ཞིག་ལ་སྐྱེས་ནས་བོད་ཆོལ་ཁ་གསུམ་གྱི་རྒྱ་ཆེའི་མི་མང་དང་། བོད་ལ་ནཱ་ལེནྡྲའི་ཆོས་བརྒྱད་ཀྱི་སངས་རྒྱས་ཀྱི་བསྟན་པ་ཧ་ལས་པ་ཞིག་ཡོད་པ་འདི་རྒྱུན་འཛིན་ཐུབ་པར་ལས་དང་སྨོན་ལམ་གྱིས་འབྲེལ་བ་ཆགས་པ་དེ་ལྟར་རེད། ད་ལྟའི་བར་དུ་ཧུར་ཐག་བྱས་པ་ཡིན། ད་དུང་ཡང་བོད་ཆོལ་ཁ་གསུམ་གྱི་རྒྱ་ཆེའི་མི་མང་དང་། རྒྱ་ནག་མི་མང་དང་བཅས་པ་ཡོངས་སུ་རྫོགས་པའི་སངས་རྒྱས་བསྟན་པའི་ཐོག་ཞབས་འདེགས་སྒྲུབ་པའི་བཟོ་ལྟ་ཞིག་ཆགས་ཡོང་གི་འདུག་ལ། དེང་སང་རྒྱ་ནག་ཏུ་དོ་སྣང་བྱེད་མཁན་ཤུགས་ཆེ་རུ་འགྲོ་བཞིན་འདུག ངོས་ཀྱིས་སྤྱིར་སངས་རྒྱས་ཀྱི་བསྟན་པ་དང་། ཡང་སྒོས་བོད་གངས་ཅན་ལྗོངས་ཀྱི་ཆོས་དང་རིག་གཞུང་གཏིང་ཟབ་མོ་ཡོད་པ་འདི་ཉམས་པ་སོར་ཆུད་དང་། མི་ཉམས་གོང་འཕེལ་ཡག་པོ་ཞིག་ཡོང་ཐུབ་པའི་སྨོན་ལམ་ཞུ་བཞིན་ཡོད་ལ། ཕལ་ཆེར་དེ་ལྟ་བུ་ཞིག་ཡོང་བར་ཡིད་ཆེས་ཡོད། ཚང་མར་ཐུགས་རྗེ་ཆེ། བཀྲ་ཤིས་བདེ་ལེགས། ཞེས་བཀའ་སློབ་བསྩལ་སོང་།